Ra’iisal Wasaaraha Jarmalka, Angela Merkel waxa ay Axadii maanta booqasho rasmi ah ku tagtey Magaalada Istanbul, iyadoo dhinaca kalana kula kulantay Madaxweynaha iyo Ra’iisal Wasaaraha Turkiga.

Ahmet Davutoglu, Ra’iisal Wasaaraha Turkiga, ayaa Angela Merkel ku soo dhaweeyay Istanbul, waxayna si weyn uga wada hadleen, sidii loo joojin lahaa qaxootiga sida xoogan ugu soo tahriibaya Qaaradda Yurub, xilli Turkiga lagu siin doono dhaqaalo.

Masuuliyiintan oo si wada jir ah shir jaraa’id u qabtay, ayaa waxay ku faah faahiyen waxyaabihii ay ka wada hadleen, waxayna Angela Merkel sheegtay inay ka wada hadleen uun qulqulka qaxootiga ku soo yaacaaya Yurub iyo sidii lagu hakin lahaa.

Waxay ku celisay inaysan aqbali doonin in Turkiga uu xubin ka noqdo Ururka Midowga Yurub, balse ay ballanqaadeyso in dadka reer Turki ay bilaa fiiso ku taggaan Wadamada Yurub, dhaqaalana lagu siiyo la tacaalidda tahriibayaasha.

Ahmet Davutoglu, ayaa wuxuu ku baaqay in qaxootiga lagu xakameeyo gudaha dalka Suuriya, iyadoo laga hirgelinayo goob xasiloon oo dadku ku noollan karaan, inkastoo ay taasi ka hortimid marwo Merkel.

Dhanka kale Madaxweynaha Turkiga, Recep Tayyip Erdoğan oo qaabilay haweeneydaasi, ayaa wuxuu ugu baaqay in ay taageerto in Turkigu uu ka mid noqdo Wadamada Midowga Yurub, si iyana ay u joojiyan qulqulka muhaajiriinta.

Waxay Madaxweynaha Turkiga ugu laab qaboojisay inay siin doonto taageero hagar la’aaneed, haddii Xukuumadda Ankara aqbalayso hakinta dadka ka soo cararaaya dagaalada Suuriya. Turkiga waxaa hadda ku nool laba milyan oo qaxooti reer Suuriya ah.

Sanadkan, ayaa waxaa la saadaaliyay in hal milyan oo qaxooti ah ay magangelyo weydiisan doonaan Jarmalka, waxayna taasi walaac xoogani ku dhalisay Xukuumadda Berlin.

Booqashada Angela ee Turkiga, ayaa waxay ka turjumaysaa sida Ururka Midowga Yurub uu ugu baahan yahay Turkiga, in ka badan intii hore ee jirtay. Midowga Yurub waxa uu la daallaa dhacayaa qulqulka qaxootiga ka soo burqanaya dalalka ay ka mid tahay Suuriya, sidoo kalana waxa ay raadinayan tallaabo wanaagsan oo lagu yarayn karo qulqulkooda.

ISTANBUL, TURKEY – OCTOBER 18: German Chancellor Angela Merkel (L) meets Turkey’s President Recep Tayyip Erdogan at the Yildiz Palace State apartments during her visit in Istanbul, Turkey on October 18, 2015. (Photo by Turkish Presidency / Murat Cetinmuhurdar/Anadolu Agency/Getty Images)

Turkish Prime Minister Ahmet Davutoglu, right, greets Germany’s Chancellor Angela Merkel, left, prior to their meeting at his office in Dolmabahce Palace in Istanbul, Sunday, Oct. 18, 2015. Merkel is meeting Turkish leaders to promote a EU plan that would offer aid and concessions to Turkey in exchange for measures to stem the mass movement of migrants across Europe’s borders. (Bulent Kilic, Pool Photo via AP)