Madaxweynaha Kenya William Ruto ayaa goor dhoweyd ku dhowaaqay qaar ka mid ah xubnaha golaha cusub ee wasiirrada ee dalkaaasi.

Xidhibaan Aadan Barre Ducaale ayaa loo magacaabay wasiirka gaashaandhigga Kenya, halka Alfred Mutua uu ka noqonayo wasiirka arrimaha dibedda, sida ay sheegtay warbaahinta Kenya.

Xubnaha kale ee golaha wasiirrada waxaa ku jira Moses Kuria oo noqonaya wasiirka ganacsiga iyo waarshadaha, iyo Kithure Kindiki oo noqonaya wasiirka arrimaha gudaha.

Madaxweynaha Kenya ayaa sidoo kale magacaabay Musalia Mudavadi oo ka mid ah hoggaamiyayaasha axsaabta isbahaysiga la lahaa madaxweynaha inuu noqdo Xoghayaha Koowaad ee Golaha Wasiirrada.

Xafiiska Ergayga Gaarka ee Dib u soo celinta Muhaajiriinta iyo Carruurta ee Dowladda Soomaaliya, ayaa maanta dalka dib ugusoo celiyey 9 dhallinyaro Soomaaliyeed oo Liibiya ku xayirnaa sannado badan, oo Magafe ka soo baxsaday, ka dibna yimid Safaaradda Soomaaliya ee Tripoli si ay dalkooda dib ugu soo laabtaan iyagoo la soo xariirey Xafiiska Ergayga Gaarka ah.

Waxaa Garoonka Diyaarradaha Aadan-Cadde ee Magaalada Muqdisho ku soo dhaweeyey Ergeyga Gaarka ah ee Xuquuqda muhaajiriinta iyo carruurta Amb. Maryan Yaasiin Xaaji Yuusuf iyo xubno ka mid ah Xafiiska Ergayga Gaarka ah.

Amb. Maryan oo dedaalkaan soo wadday Illaa iyo 2016 ayaa dalkooda ku soo celisay dhallinyaro tiro badan oo ku jiray xabsiyo kala duwan isla markaana baadi goob u gashay samo-tabixinta dhallinta ku go,doonsan daafaha caalamka, iyadoo uga mahad celisay Madaxwenaha dalka iyo Ra’iisul Wasaarah dadaalka ay galiyeen badbaadda dhallinyarada Soomaaliyeed.

Wasiirka Arrimaha Dibedda iyo Xiriirka Caalamiga ee Soomaaliya Abshir Cumar Jaamac (Huruuse) oo la kulmay dhiiggiisa Liibiya ayaa kala hadlay badbaadada Dhallinyarada Soomaaliyeed ee dalkaasi ku xayirran sidii dib loogu soo celin lahaa dalkooda hooyo

Dowladda Soomaaliya ayaa horay u sheegtay inay dadaal dheer ugu jirto in muwaadiniinta Somaaliyeed ee xabsiyada dalalka kala duwan ku jira iyo kuwa ku dhibaateysan isla markaana ku xayiran dalalkaas in ay dalkoodu dib ugu soo celiso.

Ciidamo katirsan kuwa daraawiishta dowlad Goboleedka Galmudug, isla markaana gadoodsan ayaa waxaa ay la wareegeen Kastamka Canshuuraha magaalada Gaalkacyo qeybta Galmudug, halkaas oo Gaadiidka lacag looga qadi jiray.

Ciidamadan oo wata Gaadiidka dagaalka noocyadooda kala duwan ayaa waxaa ay sheegeen inay cabasho ka yihiin xaquuq kaga maqan Maamulka Galmudug ee uu hoggaamiyo Madaxweyne Axmed Cabdi Kaariye ( Qoor Qoor).

Ciidmadan ayaa horay sidaan oo kale u xirtay waddooyinka  soo gala magaalada Gaalkacyo ee Gobolka Mudug, hayeeshee markii dambe ay u fureen Maamulka Gobolka  Mudug oo u ballan qaaday in xaquuqda ka maqan uu uga keenayo Madaxweynaha Galmudug.

Saraakiisha hoggaamineysa Ciidamada gadoodsan ayaa waxaa ay sheegeen in Madaxweynaha Galmudug uu uga baxay ballan ay horay ula galeen, waxaana xalay ilaa saaka ku xayiran Gaadiid farabadan Kastamka Canshuuraha Magaalada Gaalkacyo

Maamulka Gobolka Mudug ee Galmudug ayaan weli ka hadlin xeritaanka Kastamka Canshuuraha magaalada Gaalkacyo ee Ciidamada Daraawiista Galmudug, iyada oo ay socdaan wada-hadallo xal looga gaarayo.