Xarunta Villa Haegeysa ayaa waxaa ka taagan xaalad Jahwareer ah, waxaana kulan la filayay inuu u furmo Xildhibaanada Golaha Shacabka uu mar qura isku bedelay Buuq iyo Fowdo.

Kulanka Golaha Shacabka ee furmi lahaa ayaa lagu kala tegay, kaddib markii furitaanki shirka ay is hortaageen qaar ka mid ah Xildhibaannada Mucaaradka oo diiday in shirka furmo.

Guddoomiyaha Golaha Shacabka Maxamed Mursal Sheekh C/raxmaan ayaa faray howl wadeenada Barlamaanka in ay soo qoraan xildhibaanada is hor istaaga ku sameeyay kulanki maanta si tallaabo looga qaado sida uu qabo xeer hoosaadka Baarlamaanka.

Ajendaha kulanka Xildhibaanada ayaa waxaa uu ahaa Cudurka halista ah ee COVID-19, hayeeshee qaar kamid ah Xildhibaanada ayaa sheegaya in kulanka lagu wato qorshe muddo kordhin loogu sameeynayo Hay’addaha dowladda iyo Madaxweynaha.

Xildhibaano farabadan oo ka tirsan Golaha Shacabka oo goorsii horreeysay Xarunta Villa Haegeysa tegay ayaa diiday inay saxiixaan buuga lagu xaadiriyo Xildhibaanada, si kooramka Golaha u furmo, isla markaana sheegay in Guddoonka uu damacsan yahay in muddo kordhin uu sameeyo.

Magaalada Muqdisho gaar ahaan hotel ku dhex yaalla Xerada Xalane ee Garoonka diyaaradaha Aadan Cadde ayaa waxaa goor dhow uu Shir gaar ah uga furmay Madaxweyneyaasha dowlad Goboleedyada dalka.

Shirka ayaa waxaa looga hadlayaa xaaladda Cakiran ee siyaasadda dalka, marxaladihii ugu dambeeyay iyo khilaafka ka taagan qabsoomida doorashada ka dhaceysa Soomaaliya aan weli heshiis laga gaarin.

Sidoo kale Shirka Madaxweyneyaasha dowlad Goboleedyada ayaa waxaa looga arrinsanayaan furitaanka Ajendaha Shirka Madaxda dowladda Federaalka iyo kuwa maamulada, kaasi oo ka dhacaya Teendhada Afisyooni.

Shirka haatan ka socda Xerada Xalene ayaa waxaa ka qeyb galaya Madaxweyneyaasha Puntland Saciid Deni, Jubbaland Axmed Madoobe, Koonfur Galbeed Cabdicaiis Lafta-gareen, Hirshabeelle Cali Guudlaawe iyo Galmudug Axmed Qoorqoor.

Madaxda maamulada ayaa saacadihii lasoo dhaafay Caasimadda dalka ku yeeshay kulamo gaar gaar ah oo hordhac u ahaa Shirka u furmay, iyagoonka siweyn uga hadlaya khilaafka ka taagan doorashada.

Madaxweyneyaasha Puntland iyo Jubbbaland Axmed Madoobe iyo Saciid Deni ayaa diiday ka qeyb galka Shir dhexmaray Madaxda dowladda iyo kuwa maamul Goboleedyada dowladda taageersan.

Waxaa maanta Puntland ka bilaawday Tallaalka Covid19, kaasi oo wasiirka cadaalada,Dastuurka, arimaha diinta iyo dhaqan celinta uu ka furay xarunta wasaaradda caafimaadka Gobolka Nugaal.

Waxaa ka qaybgalay furitaanka talaalka Wasiirka Caafimaadka oo uu weheliyo kuxigeenkiisa iyo agaasimaha guud, sidoo kale waxaa goob ka ahaa saraakiil ka socday hay’addaha WHO iyo UNICEF.

Wasiirka wasaaradda caafimaadka Dr Jamac Farax Xasan oo hadal kooban ka jeediyay furitaanka talaalka ayaa yiri:-

“ Wasaaradda caafimaadka Puntland oo ka duulaysa helitaanka talaal lagu kalsoonaan karo ayaa maanta halkaan waxay ka daahfuraysaa tallaalka Covid19 oo ilaa 40 goobood hal mar ka wada bilaabanaya, xarumahan ayaa ku kala yaala 9 gobol ee Puntland.”

“Wajiga hore ee tallaalka ayaa loogu talagalay inay qataan dadka safka hore oo ay ka mid yihiin shaqaalaha Caafimaadka, Macalimiinta, Ciidamada Booliiska,Dadka waaweyn ee qaba xanuunada Sonkorta iyo dhiig karka.”

Talaalka ayaa socon doona 10 bari waxaana wajiga labaad uu bilaaban doonaa bisha May Ee sanadkan, talaalka maanta bilawday ayaa ka kooban 40,000 oo dos, marka dadka loogu talagalay dhamaadaan ayaa loo ogolaan doonaa in bulshada kale la siiyo.”

Wasiirka cadaalada, Dastuurka, Arimaha Diinta iyo dhaqancelinta Cawil Sheekh Hamid oo tallaalka furay ayaa yiri:- “ Waxaan ku faraxsanahay inaan kala soo qaybgalo Wasaaradda caafimaadka daahfurka loo samaynayo talaalka Covid19 Puntland oo maanta bilaabanaya waxaaan uga mahadcelinayaa wasaaradda dadaalka ay galisay helitaanka talaalka iyo inay ka shaqaysay inuu wada gaaro dhamaan deegaada Puntland, waliba isaga oo lagu heli karo si bilaash ah.”

“Waxaan muwaadiniinta usoo jeedinayaa inay talaalka qataan oo badbaadiyaan naftooda iyo tan qoyskooda.”

Puntland ayaa noqonaysa meesha kaliya Soomaliya ee talaalka laga bixiyo 40 goobood oo iskugu jira kuwa dawlada iyo kuwa gaarka loo leeyahay, wasaaradda caafimaadka waxaa masuuliyada ka saarantahay badbaadinta bulshadda dhanka caafimaadka iyo helida adeeg Caafimaad oo tayo leh laguna kalsoonaan karo.

Dhamaanteen aan ka badbaadino nafteena iyo nafta dadka kale COVID-19 ee fadlan Xiro af xirka (Facemask), Gacamahaagan si joogata ah ugu dhaq shaambo ama saabuun, Dadka kale u jirso masaafo 1 mitir ah sidoo kale qaado Tallaalka COVID-19 oo kordhi difaaca jirkaaga.